धक्कादायक! कोल्हापूर जिल्ह्यात 60 हजारांचे टोमॅटो लंपास

कोल्हापूर / माझा महाराष्ट्र, प्रतिनिधी

कोल्हापूर जिल्ह्यात 60 हजारांचे टोमॅटो चोरीला गेल्याची घटना उघडकीस आली आहे. 

शिरोळ तालुक्यातील हेरवाड येथील अशोक मस्के यांच्या शेतात ही चोरी झाली. मस्के यांनी 30 गुंठ्यात टोमॅटोची लागवड केली आहे. सकाळी ते शेतात गेले असता त्यांना हा सर्व प्रकार निदर्शनास आला. सध्या बाजारपेठेमध्ये टोमॅटोला प्रति किलो 160 रुपये दर मिळत आहे. त्यामुळे राज्यातील शेतकऱ्यांना दिलासा मिळाला आहे. मात्र, जिल्ह्यात काही दिवसांपूर्वी एका शेतकऱ्याच्या टोमॅटो शेतीची नासधूस केल्याची घटना ताजी असतानाच आता टोमॅटोच चोरीला गेल्याची घटना घडली आहे. शेतात सीसीटीव्ही असतानाही चोरट्यांनी ही चोरी केल्याने शेतकऱ्यांमध्ये भीतीचे वातावरण आहे.