डिजिटल इंडियाच्या स्वप्नपूर्तीसाठी ‘स्वराज्य निर्माण’चा पुढाकार

सुभाष भोसले / माझा महाराष्ट्र, प्रतिनिधी

कागल तालुक्यातील शाळेतील विद्यार्थ्यांना माहिती तंत्रज्ञानाचे धडे गिरविण्यातील अडचण दूर होण्यासाठी शाळेतील विद्यार्थ्यांची संगणक शिकण्याची इच्छा लक्षात घेवून महा एनजीओ डेव्हलपमेंट असोसिएशनच्या माध्यमातून स्वराज्य निर्माणचे संस्थापक संदिप बोटे यांनी चिखलीच्या जिल्हा परिषद शाळेला प्रत्येकी एक संगणक संच मिळवण्यासाठी पुढाकार घेतला आहे.

महा. एनजीओ डेव्हलपमेंट असोसिएशन ऑफ इंडिया द्वारे राबविण्यात येत असलेला 'एक हात मदतीचा' सीएसआर सहभागावर आधारित एक अनोखा उपक्रम हाती घेण्यात आला आहे. प्रत्येक गरज पूर्ण करण्यासाठी शासन आणि प्रशासनावर अवलंबून राहण्यापेक्षा सीएसआर कंपनी आणि लोकसहभागातून शक्य त्या गरजा पूर्ण करून शाळेतील विद्यार्थ्यांच्या अडचणी दूर करणे हा या उपक्रमाचा मुख्य हेतू आहे. याच उपक्रमांतर्गत शाळेतील विद्यार्थ्यांची संगणकाची गरज सीएसआर फंडाच्या माध्यमातून पूर्ण करण्यात येणार आहे.

सध्याचे युग हे माहिती तंत्रज्ञानाचे असून सर्वच ठिकाणी संगणकाचा उपयोग होत आहे. डिजिटल इंडियाच्या स्वप्नपूर्तीसाठी शालेय स्तरावरच विद्यार्थ्यांना संगणक हाताळण्याचे कौशल्य प्राप्त झाले पाहिजे. त्यामुळे डिजिटल इंडियाच्या स्वप्नपूर्तीसाठी आम्ही महा. एनजीओ डेव्हलपमेंट असोसिएशनने सीएसआर फंडच्या माध्यमातून खारीचा वाटा सामाजिक कामातून उचलत असल्याचे मत महा.एनजीओ डेव्हलपमेंट अशोशिएशनचे संपर्कप्रमुख आणि स्वराज्य निर्माणचे संस्थापक संदिप बोटे यांनी व्यक्त केले आहे.