व्हीप न पाळल्याबद्दल खा. उदयनराजेंना नोटीस पाठवणार

नवी दिल्ली : एक देश एक निवडणूक विधेयक काल लोकसभेत मांडण्यात आलं. यावेळी सभागृहात खासदार उदयनराजेनसह सत्ताधारी भारतीय जनता पक्षाचे अनेक खासदार गैरहजर होते. या अनुपस्थितीबद्दल पक्षानं त्यांना नोटीस पाठवण्याची तयारी सुरु केली आहे. व्हिप जारी केल्यानंतरही सदनात उपस्थित का राहिला नाहीत, अशी विचारणा भाजपकडून अनुपिस्थत खासदारांना केली जाणार आहे.

एक देश एक निवडणूक हा मुद्दा भाजपच्या अजेंड्यावर आहे. यंदाच्या लोकसभा निवडणुकीत या विषयाचा अंतर्भाव भाजपच्या जाहीरनाम्यातदेखील होता. त्यामुळे एक देश एक निवडणूक भाजपसाठी महत्त्वाचा विषय आहे. एक देश एक निवडणूक विधेयक काल लोकसभेत मांडण्यात आलं. या पार्श्वभूमीवर भाजपनं त्यांच्या खासदारांना व्हिप बजावला होता. लोकसभेत हजर राहा, अशी स्पष्ट सूचना त्यातून करण्यात आलेली होती. पण तरीही भाजपचे २० पेक्षा अधिक खासदार लोकसभेत अनुपस्थित होते.

जगदंबिका पाल, शांतनु ठाकूर, बी. एस. राघवेंद्र, गिरीराज सिंह, ज्योतिरादित्य सिंधिया, विजय बघेल, भागीरथ चौधरी, उदयनराजे  भोसले, जयंत कुमार रॉय, जगन्नाथ सरकार यांना नोटीस पाठविण्यात येणार आहे. हे खासदार व्हिप जारी केलेला असतानाही सभागृहात अनुपस्थित होते. 

कायदा मंत्री अर्जुन राम मेघवाल यांनी एक देश एक निवडणूक विधेयक लोकसभेत मांडलं. त्यावेळी सभागृहात मोठा गदारोळ झाला. यावर राजकीय पक्षांचे वेगवेगळे सूर ऐकायला मिळाले. काँग्रेससह विरोधी पक्षांनी विधेयकाला कडाडून विरोध केला. तर शिवसेना, तेलगु देसम पक्षानं विधेयकाला पाठिंबा

लोकसभेत एनडीएचं एकूण संख्याबळ २९३ आहे. पण एक देश एक निवडणूक विधेयकाच्या बाजूनं २६९ खासदारांनी मतदान केलं. भाजपचे २० पेक्षा अधिक खासदार लोकसभेत नव्हते. खासदारांनी हजर राहावं यासाठी भाजप, काँग्रेसकडून तीन ओळींचे व्हिप जारी करण्यात आले होते. भाजपचे मित्रपक्ष असलेल्या शिवसेना, टीडीपी यांनीही त्यांच्या खासदारांना व्हिप बजावले होते.