किणे येथे राहत्या घराची भिंत कोसळून महिला ठार

कोल्हापूर / प्रतिनिधी


आजरा तालुक्यातील किणे गावात राहत्या घराची भिंत कोसळून एका महिला मृत्यू झाला असून दोघे गंभीर जखमी झाले आहेत. सुनिता अर्जुन गुडुळकर असे मृत्यू झालेल्या महिलेचे नाव असून, अर्जुन गुडुळकर आणि वत्सला गुडुळकर अशी गंभीर जखमी झालेल्यांची नावे आहेत. आज पहाटेच्या सुमारास ही घटना घडली. जखमींवर नेसरी ग्रामीण रुग्णालयात उपचार सुरु आहेत. 

आजरा परिसरात मुसळधार पाऊस सुरू आहे. या मुसळधार पावसामुळे गुडुळकर यांच्या घराची भिंत अचानक कोसळली. भिंत कोसळल्याने मोठा आवाज आला. या आवाजाने ग्रामस्थांनी घटनास्थळाकडे धाव घेत भिंतीखाली दबलेल्यांना तातडीने बाहेर काढण्यात आले. त्यांना रुग्णालयात नेत असताना वाटेतच सुनिता गुडुळकर यांचा मृत्यू झाला. जखमी दोघांना तात्काळ नेसरी ग्रामीण रुग्णालयात दाखल करण्यात आले. या घटनेची माहिती समजताच तहसिलदार समीर माने, गटविकास अधिकारी दाजी दाईंगडे, निवासी नायब तहसिलदार म्हाळसाकांत देसाई यांनी घटनास्थळी भेट देऊन पंचनामा केला.