केपींना मोठ्या मताधिक्क्याने निवडून देऊन राधानगरी मतदारसंघात इतिहास घडवूया :आमदार सतेज पाटील यांचे आवाहन

राधानगरी (प्रतिनिधी) : मागच्या दहा वर्षांत काय घडले,कशा कशा तडजोडी झाल्या हे सगळे बाजूला सारूया आणि राधानगरी विधानसभा मतदारसंघाचा नवा इतिहास घडविण्यासाठी के पी पाटील यांना मोठ्या मताधिक्याने निवडून देवूया,असे आवाहन काँग्रेसचे जिल्हाध्यक्ष आमदार सतेज पाटील यांनी केले.

माजी आमदार के पी पाटील यांच्या प्रचारार्थ गुडाळ (ता. राधानगरी) येथे झालेल्या महाविकास आघाडीच्या सभेत ते बोलत होते. अध्यक्षस्थानी ज्येष्ठ नेते ए डी पाटील होते.

सतेज पाटील पुढे म्हणाले,"गेल्या दहा वर्षांत विद्यमान आमदारांनी काँग्रेसला संपविण्याचे काम केले. यावेळी ही प्रवृत्ती आपण मोठ्या ताकदीने मोडून काढूया. महाविकास आघाडीचे प्रमुख नेते असलेल्या शिवसेना पक्षप्रमुख उद्धव ठाकरे यांनी के पी पाटील यांच्यासाठी आदमापूर येथे प्रचारसभा घेत राज्यातील प्रचाराचा प्रारंभ केला व के पीं ना निवडून देण्याची जबाबदारी जाहीर सभेत माझ्यावर सोपविली. माझ्यासाठी ही अभिमानाची बाब आहे;परंतु ही आता केवळ माझी एकट्याची जबाबदारी राहिली नसून आपल्या सर्वांची आहे असे समजून ताकदीने कामाला लागू या. के पी पाटील हे अनुभवी व जुने जाणते नेते असून त्यांच्या रूपाने राधानगरीचा निकाल महाविकास आघाडीच्या बाजूने लागणार हे सांगायला आता कुठल्या ज्योतिषाची गरज नाही."

काँग्रेसचा सर्वसामान्य कार्यकर्ता हीच माझी कवच कुंडले असून राज्यातील राजकारणात महाविकास आघाडीचे पारडे जड असल्याने त्यामध्ये कोल्हापूरचा वाटा ठळक असण्यासाठी के पी पाटील यांच्यासह महाविकास आघाडीचे सर्वच उमेदवार निवडून देणे गरजेचे असल्याचेही त्यांनी सांगितले.

शिवसेना उपनेते विजय देवणे म्हणाले,"देवेंद्र फडणवीस यांच्या नेतृत्वाखाली भाजपा महायुतीचे सरकार पाडण्याची पहिली सभा राधानगरी विधानसभा मतदारसंघात पक्षप्रमुख उद्धव ठाकरे यांनी घेतली असून सतेज पाटील यांनी के पी पाटील यांना निवडून आणण्याची जबाबदारी उचलल्याने केपींच्या उमेदवारीला मोठे बळ मिळाले आहे."

यावेळी माजी आमदार के पी पाटील,गोकुळचे माजी संचालक पी डी धुंदरे,सदाशिवराव चरापले,सजयसिंह पाटील,वसंतराव पाटील, अशोक पाटील,एकनाथ पाटील,विजय मोहिते,संदीप देसाई,प्रा.विश्वास पाटील, बापूसाहेब किल्लेदार,सुरेश चौगले, दत्तात्रय पाटील,सिकंदर मुल्लाणी आदींची भाषणे झाली. सभेसाठी हिंदुराव चौगले,धैर्यशील पाटील,जनता दलाचे जिल्हाध्यक्ष वसंतराव पाटील,गोकुळचे संचालक अभिजीत तायशेटे,आर के मोरे प्रा.किसन चौगले,राहुल देसाई,बी के डोंगळे,दत्तात्रय पाटील,दीपसिंह नवणे,

 शामराव देसाई, सुरेश चौगले, सचिन घोरपडे आदींसह प्रमुख नेते व कार्यकर्ते मोठ्या संख्येने उपस्थित होते.

 अभिजीत पाटील यांनी स्वागत व प्रास्ताविक केले.यावेळी ऊस तोडणी ओढणी वाहतूक संघटना आणि म्हासुर्ली येथील मुस्लिम समाज यांनी के पी पाटील यांना पाठिंबा व्यक्त केला. तसेच भाजपाचे रामभाऊ पाटील यांच्यासह काही कार्यकर्त्यांनी काँग्रेसमध्ये प्रवेश केला.

 *कुणाचाही दबाव घेऊ नका* 

सतेज पाटील यांनी आपल्या भाषणात या निवडणुकीत कुठल्याही कर्मचाऱ्याने कुणाचाही दबाव घेण्याचे कारण नसल्याचे स्पष्ट करीत मी अनेक संस्थांचे नेतृत्व करतोय,तुमच्यासह सर्वसामान्य कार्यकर्त्यांच्या माध्यमातून मला राज्यपातळीवर नेतृत्व करण्याची संधी मिळाली असल्याने तुम्ही सर्वजण महाविकास आघाडी सोबतच राहावे असे सांगितले.