"कोल्हापूर उत्तरची जागा शिवसेनेलाच हवी!–रविकिरण इंगवले यांचा काँग्रेसला स्पष्ट संदेश"

कोल्हापूर (प्रतिनिधी) : कोल्हापूर उत्तर विधानसभा मतदार संघावर शिवसेना (उद्धव बाळासाहेब ठाकरे) पक्षाने पुन्हा आपला दावा केला आहे. लोकसभा आणि विधानसभा निवडणुकीत त्याग करून सर्व शिवसैनिकांनी कोल्हापूरची जागा काँग्रेसला दिली. त्यामुळे आता काँग्रेसने मोठ मन करून उत्तर ची जागा शिवसेना उद्धव बाळासाहेब ठाकरे पक्षाला द्यावी असे, प्रसिद्धीपत्रक शहर प्रमुख रविकिरण इंगवले यांनी प्रसिद्धीस दिले आहे.

   या पत्रकात असे म्हटले आहे, दोन वर्षांपूर्वी झालेल्या पोटनिवडणुकी वेळी शहरातील शिवसेनेचे पदाधिकाऱ्यांनी शिवसैनिकांनी रात्रीचा दिवस करून काँग्रेसच्या उमेदवारांना निवडून आणण्यासाठी अहोरात्र प्रयत्न केले होते. कोल्हापूर उत्तर विधानसभा मतदारसंघाच्या आजवरच्या इतिहासात तब्बल सहा वेळा शिवसेनेचा उमेदवार निवडून आला आहे. प्रत्येक वेळी इतर पक्षांनी शिवसैनिकांना गृहीत धरू नये उत्तरची जागा शिवसेनेला मिळाली नसल्यास शिवसेनेचे पदाधिकारी मातोश्रीचा आदेश म्हणून प्रामाणिकपणे काम करतील यात शंका नाही मात्र याचे दूर परिणाम उत्तर सह आणि दक्षिण विधानसभा मतदारसंघात देखील होऊ शकतात. अशी शंका देखील त्यांनी  व्यक्त केली. 

 शिवसैनिकांच्या त्यागाचा सन्मान करत उत्तरची जागा शिवसेनेला द्यावी. अशी मागणी या पत्रकार द्वारे केली. त्यांनी पूर्वीच्या निवडणुकांमध्ये शिवसेनेच्या उमेदवारांनी दाखवलेल्या संघर्षाचा उल्लेख करत, या मतदारसंघात शिवसेनेलाच संधी मिळणे आवश्यक असल्याचे सांगितले. तसेच, काँग्रेसने मनाचा मोठेपणा दाखवावा आणि शिवसेनेच्या उमेदवाराला पाठिंबा द्यावा, अशी अपेक्षा त्यांनी व्यक्त केली. 

    उत्तर च्या निवडणुकीत मोठ्या मनाने ठाकरे गटाला संधी द्यावी. कोल्हापूर उत्तर मधील गद्दाराला काढण्यासाठी हा मतदारसंघ शिवसेनेला द्यावा अशी मागणी इंगवले यांनी प्रसिद्धी पत्रकार द्वारे केली आहे.