Ratnagiri : जांभा चिऱ्याची वाहतूक करणारा ट्रक पलटी; सहाजण जखमी तर एकाचा मृत्यू

संगमेश्वर : तालुक्यात एक दुर्दैवी घटना घडली आहे. जांभा चिऱ्याची वाहतूक करणारा ट्रक पलटल्याने मोठा अपघात झाला असून या अपघातात जखमी झालेल्या कामगाराचा उपचार दरम्यान मृत्यू झाला आहे. या घटनेत सहा जण जखमी झाले होते. रत्नागिरी जिल्ह्यात संगमेश्वर तालुक्यात जाकादेवी परचुरी मार्गावर हा भीषण अपघात झाला आहे. या अपघातात सिद्धू मोतीराम चव्हाण वय वर्षे 32 मूळ राहणार कक्कलमेली तालुका सिंधगी जिल्हा बिजापूर सध्या वास्तव्य चवे देऊड (रत्नागिरी) याच्या डोक्याला मार लागला होता तर अन्य सहाजणांना किरकोळ दुखापत झाली होती. उपचार सुरू असताना सिद्धू मोतीराम चव्हाण याचा मृत्यू झाला आहे.

ट्रकचा ब्रेक निकामी झाल्याने अपघात 

रत्नागिरी चवे देऊड येथील अतुल अनंत सावंत यांची मालकी असलेल्या चिरेखाणीमधून त्यांच्याच मालकीच्या असलेल्या ट्रक क्रमांक MH-10-AW-2757 यामध्ये चिरेखाणीमधून चिरे भरून चालक आनंद धरसिंग राठोड ट्रक घेऊन निघाला होता. दरम्यान, चवे येथून परचुरी बौद्धवाडी येथे त्याच्या बरोबर चिरे उतरवण्यासाठी अन्य सहा कामगारांना ट्रक च्या कॅबिन मध्ये बसवून तो घेऊन निघाला असताना हा अपघात झाला. संगमेश्वर पोलीस ठाणे दूरक्षेत्राच्या हद्दीत असलेल्य परचुरी येथे उक्षी रेल्वेस्टेशनकडे जाणाऱ्या वळण असलेल्या उतारात ट्रक चा ब्रेक निकामी झाल्याने तो ट्रक रस्त्याबाहेर जाऊन पलटी झाला होता.

या अपघाताची माहिती ट्रकचे मालक अतुल अनंत सावंत यांनी स्वतः संगमेश्वर पोलीस ठाण्याला दिली. घटनेची माहिती मिळताच संगमेश्वर पोलीस ठाण्याचे पोलीस निरीक्षक अमित यादव, डिंगणी पोलीस दूरक्षेत्राचे हेड कॉन्स्टेबल शांताराम पंदेरे, कॉन्स्टेबल म्हस्कर, कोलगे ह्यांनी घटनास्थळी पोहचून अपघाताची पाहणी करून पंचनामा केला असून, या घटनेचा अधिक तपास पोलीस निरीक्षक अमित यादव यांच्या मार्गदर्शनाखाली शांताराम पंदेरे करत आहेत.