विकासकामांची मागील बिले ५ मार्चपूर्वी अदा करण्याचे सीईओ कार्तिकेयन .एस यांचे आदेश
majhamaharashtra 
कोल्हापूर : जिल्हा नियोजन मंडळ, १५ वित्त आयोग व आर्थिक नियोजनातून जिल्हा परिषदेला प्राप्त झालेल्या निधीतून जी विकासकामे केली आहेत, त्यांचे बिल मागणीचे प्रस्ताव २८ फेब्रुवारीपर्यंत जमा करून घेऊन ५ मार्च पूर्वी बिले अदा करण्याच्या सुचना मुख्य कार्यकारी अधिकारी कार्तिकयन एस. यांनी बैठकीत संबंधित अधिकाऱ्यांना दिल्या. सीईओ कार्तिकयन एस. यांनी बुधवारी जिल्हा परिषदेतील अनेक विभागांची आढावा बैठक घेतली.
यावेळी त्यांनी विकासकामे तत्काळ मार्गी लावण्याच्या सूचना दिल्या. यामध्ये विशेषतः २०२३-२४ आर्थिक वर्षात जिल्हा नियोजन विभागाकडील ३०- ५४ आणि ५०-५४ या लेखाशीर्षातून जी विकासकामे पूर्ण झाली आहेत,
त्यांच्या बिल मागणीचे प्रस्ताव संबंधित ठेकेदारांकडून २८ फेब्रुवारीपर्यंत जमा करून घ्यावेत. ५ मार्चपर्यंत बिलाची रक्कम अदा करावी, अशा सूचना बांधकाम विभागाचे कार्यकारी अभियंता सचिन सांगावकर यांना दिल्या. मार्च महिन्यात शेवटच्या काही दिवसांत बिल मंजुरीसाठी होणारा गोंधळ टाळण्यासाठी सीईओंनी विकासकामांचा आढावा घेऊन सूचना दिल्या.
