Pahalgam Terrorist Attack On Tourists: 'ते' दहशतवादी अद्यापही पहलगाममध्येच? काश्मिरी कुटुंबाच्या घरी केले जेवण

श्रीनगर: पहलगाम दहशतवादी हल्ल्यात सहभागी असलेले दहशतवादी हे अजूनही काश्मीर परिसरात असल्याची माहिती आहे. सुरक्षा यंत्रणांनी दिलेल्या माहितीनुसार, पहलगामच्या आसपासच्या जंगलात किंवा वस्तीत अजूनही हे दहशतवादी लपून बसले आहेत. सूत्रांनी दिलेल्या माहितीनुसार, दोन दिवसांपूर्वी संशयित दहशतवादी एका घरात जेवण करुन पळून गेले होते.

सुरक्षा यंत्रणांनी पहलगाम हल्ल्यात सहभागी असलेल्या दहशतवाद्यांची रेखाचित्रे जेव्हा त्या कुटुंबीयांना दाखवली तेव्हा त्यांनी त्यांची ओळख पटवली. सूत्रांनी दिलेल्या माहितीनुसार, दहशतवाद्यांनी अलीकडच्या काळात सॅटेलाइट फोनचाही वापर केल्याची माहिती आहे.

या सगळ्याच्या आधारे असे मानले जाते की, हल्लेखोर दहशतवादी फार लांब कुठे जाऊ शकले नाहीत. या भागात ते सतत आपले ठिकाण बदलत आहे. जंगलातील गुहांमध्ये किंवा जवळपासच्या वस्तीत ते लपलेले असण्याची शक्यता आहे. पहलगाम परिसरात गेल्या सात दिवसांपासून सुरू असलेली शोध मोहीमेअंतर्गत घेराबंदी अधिक कडक करण्यात आली आहे.

शोध मोहिमेत स्निफर डॉग आणि ड्रोनचीही मदत घेतली जात आहे. याशिवाय, पहलगाममधील बैसरन आणि हप्तगुंडच्या वरच्या भागात आपल्या गुरांसह तळ ठोकून बसलेल्या भटक्या गुर्जर-बकरवाल समाजातील काही लोकांनीही दहशतवाद्यांना पाहिल्याचा दावा केला असून त्यांची ओळख पटवली आहे. त्यांना वाटलं की हे जवळपासच्या वस्तीतील ग्रामस्ख आहेत, जे वरच्या जंगलात लाकूड गोळा करण्यासाठी किंवा औषधी वनस्पतींच्या शोधात आले असावेत.

हल्लेखोर दहशतवादी पहलगाम आणि हपतगुंडजवळ कुठेतरी लपलेले असल्याची माहिती आहे. सुरक्षा यंत्रणांनी या संपूर्ण परिसरात सर्व संशयास्पद घटकांवर नजर ठेवण्यास सुरुवात केली आहे. स्थानिक लोकांशी सतत संपर्क साधला जात आहे आणि त्यांच्या परिसरात संशयास्पद घटक दिसले का याबाबत विचारणा केली जात आहे. या वसाहतींमध्ये येणाऱ्या-जाणाऱ्यांवरही नजर ठेवण्यात येत आहे.