प्रेमविवाहाचं भीषण रूप: वादातून पतीकडून गर्भवती पत्नीचा गळा दाबून खून

विशाखापट्टणम : आंध्र  प्रदेशातील विशाखापट्टणममध्ये प्रेमविवाह केलेल्या एका गर्भवती महिलेचा तिच्या पतीने गळा दाबून खून केल्याची हृदयद्रावक घटना समोर आली आहे. काही आठवड्यांत आई होणारी अनुषा ही 27 वर्षांची महिला आपल्या पती ज्ञानेश्वरसोबत नवजीवनाच्या वाटचालीवर होती. मात्र, वैवाहिक वादांनी हे नातं इतकं विषारी झालं की पतीने पत्नीचा जीव घेतला.

पोलिसांच्या माहितीनुसार, अनुषा आणि ज्ञानेश्वर यांचा प्रेमविवाह 10 डिसेंबर 2022 रोजी झाला होता. ज्ञानेश्वरच्या कुटुंबाच्या विरोधात जाऊन त्यांनी लग्न केले होते. सुरुवातीला सर्व काही सुरळीत वाटत असले तरी काही महिन्यांतच दोघांमध्ये सतत वाद होऊ लागले.

वादातून अमानवी कृत्य

डिलिव्हरी अगदी काही दिवसांवर आली असतानाच, एका वादात ज्ञानेश्वरने अनुषाचा गळा दाबून खून केला. त्यानंतर हा नैसर्गिक मृत्यू असल्याचा बनाव करत त्याने तिला रुग्णालयात नेले आणि मित्रांना "ती अचानक बेशुद्ध झाली" असं सांगितलं. मात्र, अनुषाच्या कुटुंबाला शंका आल्याने त्यांनी पोलिसांत तक्रार दाखल केली.

गुन्ह्याची कबुली आणि अटक

पोलिस तपासात, ज्ञानेश्वरने आपला गुन्हा कबूल केला. त्याने सांगितले की, अनुषाला त्याच्या दुसऱ्या संबंधांबद्दल संशय होता आणि त्यातून वाद वाढले. अखेरच्या वादात त्याने तिचा गळा दाबून खून केला. पोलिसांनी त्याच्यावर खुनाचा गुन्हा दाखल करून अटक केली आहे.

समाजातून संतापाचा उद्रेक

या हत्येने मोठी खळबळ उडवली आहे. अनेक महिला संघटनांनी आणि अनुषाच्या कुटुंबीयांनी आरोपीला कठोर शिक्षा द्यावी अशी मागणी केली आहे. पोलिसांकडून प्रकरणाची सखोल चौकशी सुरू असून, हत्येमागील पूर्ण सत्य उघड करण्यासाठी प्रयत्न सुरू आहेत.