धक्कादायक : अल्पवयीन मुलाने चाकूचा धाक दाखवत केला महिलेवर...

मुंबई: मुंबईत महिलेवरील अत्याचाराची एक धक्कादायक घटना समोर आली आहे. मुंबईतील मानखुर्द येथील परिसरात एका १७ वर्षीय अल्पवयीन मुलाने २७ वर्षीय महिलेवर चाकूचा धाक दाखवून बलात्कार केल्याची धक्कादायक घटना घडली आहे. महिला घरात एकटी असताना आरोपीने हे विकृत कृत्य केल्याची बातमी आहे. महिलेच्या मागे जाऊन दरवाजा बंद केला

पोलिसांनी दिलेल्या माहितीनुसार, सोमवारी संध्याकाळी ४.३० च्या सुमारास, २७ वर्षीय महिला तिच्या घराच्या दारात बसली होती. तर, तिची दोन मुले आत होती. तसेच, तिचा नवरा कामावर गेला होता. याचाच फायदा घेत अल्पवयीन मुलाने हा संपूर्ण प्रकार घडवून आणला. अल्पवयीन आरोपीने महिलेला घरात जाताना पाहिल्यानंतर त्याने तिच्या मागे जाऊन दरवाजा बंद केला.

यानंतर आरोपीने किचनमधून चाकू काढला आणि तिला सांगितले की जर तिने, त्याने सांगितल्याप्रमाणे गोष्टी केल्या नाहीत तर, तो तिची आणि तिच्या अल्पवयीन मुलांची हत्या करेल. यानंतर आरोपीने महिलेवर जबरदस्ती केली, आणि बाहेरून दरवाजा बंद करून घटनास्थळावरून पळ काढला. महिलेने मदतीसाठी आरडाओरडा सुरू केल्यावर शेजाऱ्यांनी बाहेरून दरवाजा उघडून, घडलेल्या प्रकाराबद्दल पती आणि स्थानिक पोलिसांना माहिती दिली.

वासनांध झालेल्या अवघ्या १७ वर्षांच्या मुलाने आपल्यापेक्षा वयाने मोठ्या असलेल्या महिलेवर, चाकूचा धाक दाखवून अत्याचार केल्याच्या घटनेमुळे परिसरात एकच खळबळ उडाली आहे.