संगीत व नाट्यशास्त्र अधिविभागात तबला कार्यशाळा उत्साहात

कोल्हापूर : शिवाजी विद्यापीठाच्या संगीत व नाट्यशास्त्र अधिविभागातर्फे काल (दि. ७) कोल्हापुरातील जेष्ठ तबला वादक डॉ. नंदकुमार जोशी यांची पारंपारिक घराणेदार रचना व बंदिशी या विषयावर एक दिवसीय तबला कार्यशाळा उत्साहात झाली.

डॉ. नंदकुमार जोशी यांचे स्वागत व सत्कार अधिविभाग प्रमुख  डॉ. विनोद ठाकूरदेसाई यांनी केले. 

या कार्यशाळेच्या प्रथम सत्रात डॉ. जोशी यांनी तबला वादनातील  पेशकार, तिस्त्र व चतस्त्र जातीचे कायदे व रेले विद्यार्थ्यांना शिकवले.  कार्यशाळेच्या दुसऱ्या सत्रात अनागत अतित, एकमुखी गत, चक्रधार गत इ. रचनांची  विद्यार्थ्यांकडून पढंत करून घेऊन त्या रचनेचा निकास विद्यार्थ्यांना शिकवला. डॉ. जोशी यांनी रियाज पद्धती साथसंगत व स्वतंत्र तबला वादन या विषयी विद्यार्थ्यांना सखोल मार्गदर्शन केले. या कार्यशाळेला अधिविभागातील तसेच बाहेरील संस्थांमधील  विद्यार्थ्यांचा  उत्तम प्रतिसाद लाभला. कार्यक्रमाचे प्रास्ताविक प्रदीप कुलकर्णी यांनी केले. या कार्यशाळेचे आयोजन प्रशांत देसाई, सचिन कचोटे यांनी केले.