सभासद नोंदणीमध्ये कोल्हापूर जिल्हा राज्यात नंबर एक करा - ना. हसन मुश्रीफ

कागल (प्रतिनिधी) - राष्ट्रवादी काँग्रेस पक्षाच्या सभासद नोंदणी मोहिमेमध्ये कोल्हापूर जिल्हा राज्यात नंबर एक करा, असे आवाहन वैद्यकीय शिक्षण मंत्री हसन मुश्रीफ यांनी कार्यकर्त्यांना केले. येणाऱ्या स्थानिक स्वराज्य संस्थांच्या निवडणुकांमध्येही राष्ट्रवादी काँग्रेस पक्ष एक नंबर असेल, असा विश्वासही त्यांनी व्यक्त केला. कागलमध्ये कोल्हापूर जिल्ह्याच्या सभासद नोंदणी मोहिमेच्या आढावा मेळाव्यात मंत्री मुश्रीफ बोलत होते. अध्यक्षस्थानी राष्ट्रवादी काँग्रेस पक्षाचे कोल्हापूर जिल्हाध्यक्ष बाबासाहेब पाटील- आसुर्लेकर होते.

मंत्री मुश्रीफ पुढे म्हणाले, हा मेळावा व सभासद नोंदणी गांभीर्यपूर्वक घेतली आहे. नेते मंडळींनीही हे गंभीरपणे घेतले पाहिजे. स्थानिक स्वराज्य संस्थेत यश मिळवण्यासाठी बाहेर गेलेल्या जुन्या कार्यकर्त्यांना पुन्हा पक्षात घेतले आहे. जूनपासून निधी मिळणार आहे. पण पूर्वीसारखा नाही. लाडकी बहीण, शेती पंपाचे वीज, नोकर पगार, पेन्शन, ग्रॅज्युएटी आदी कामांसाठी मोठ्या निधीची तरतूद करावी लागते. त्यासाठी राज्याचे उत्पन्न उत्पन्न वाढवावे लागेल. कर वाढवावे लागतील. आत्ताचे राजकारण हे कुबड्या घेऊन करण्याची वेळ नाही. त्यासाठी सभासद नोंदणी मोठ्या संख्येने झाली पाहिजे, असेही ते म्हणाले.

राष्ट्रवादी काँग्रेस पक्षाचे कोल्हापूर जिल्हाध्यक्ष बाबासाहेब पाटील - आसुर्लेकर म्हणाले, पक्षाचे राष्ट्रीय अध्यक्ष उपमुख्यमंत्री अजित पवार आणि आमचे नेते मंत्री हसन मुश्रीफ यांच्या नेतृत्वाखाली उच्चांकी सभासद नोंदणी करून या मोहिमेत कोल्हापूर जिल्हा राज्यात नंबर एक येण्यासाठी कार्यकर्त्यांनी अहोरात्र परिश्रम घ्यावे असेही ते म्हणाले.  

यावेळी जिल्हाध्यक्ष बाबासाहेब पाटील - आसुर्लेकर, मानसिंगराव गायकवाड, युवराज पाटील, प्रताप उर्फ भैय्या माने, गडहिंग्लज साखर कारखान्याचे अध्यक्ष प्रकाशभाई पताडे, जिल्हा परिषदेचे माजी उपाध्यक्ष सतीश पाटील, शशिकांत खोत, चंद्रकांत गवळी, सूर्यकांत पाटील, वसंतराव धुरे, काशिनाथ तेली, मधुकर जांभळे, शितल फराकटे, अनिल साळुंखे, बाळासाहेब देशमुख, जयसिंग चव्हाण, पंडितराव केणे, रामापा करीगार, विकास पाटील, शिवाजी देसाई, शिरीष देसाई, दीपक देसाई, आदिल फरास, नितीन दिंडे, कागल तालुका अध्यक्ष विकास पाटील- कुरुकलीकर आदी उपस्थित होते.